[Ladin] Roma, ai 12 de dezember del 2024 - Te l’ocajion di 25 egn de la Lege 482/99 sarà te la sala del Istituto di Santa Maria in Aquiro, Piazza Capranica 72, l convegn “La Tèlia de la Mendranzes Linguistiches. Idees e Strategies per l Davegnir”. L event patrozinà da l’ANCI (Sociazion Nazionèla Comuns Taliegn), en colaborazion con Istitut Cultural Ladin “majon di fascegn”, Terra de Punt, Sociazion Inniò, Cooperativa Open, Parco Culturale Palmieri, l é n moment emportant per fèr na reflescion en cont de la tutela de la mendranzes linguistiches e per pissèr a neva strategies per l davegnir.
N dialogh anter esperc, istituzions e teritories
Endrezà aldò de na scomenzadiva de la Senatora Elena Testor, l convegn tol ite raprejentanc istituzionèi, academics, esperc e promotores culturèi che da sacotenc de egn i laora per valorisèr l patrimonie linguistich e culturèl de la comunitèdes de mendranza te la Tèlia. Anter i relatores: Elena Testor, Senatora de la Republica, Vincenzo Santoro, Responsabol Cultura ANCI, Marco Stolfo, Università de Torin, Sabrina Rasom, Diretora del Istitut Cultural Ladin “majon di fascegn”, Pantaleo Rielli, Diretor del Parch Turistich Culturèl Palmieri, Leo Virgili, President de la Sociazion Inniò e promotor de SUNS Europe, Tore Cubeddu, Diretor de Ejatv.
Data di pubblicazione: 04/12/2024
